Уйбаан Бөтүүнүскэй

Герой Аанаҕа

Кыракый оҕотук сааскыттан

Кырыымчык олоҕу билбитин,

Кыһыҥҥы тымныылыын эриһэн,

Кыыс оҕо кылаана буолбутун.

Алдьархай ааҥнаабыт кэмигэр

Эр дьону солбуйан хаалбытын,

Үлэҕэ бар дьоҥҥун күүрдэҥҥин,

"Үлэһит үтүөтэ" – дэппитин.

Дьахтарга кистэлэҥ күүс баарын

Ол онно эн чахчы көрдөөттүн,

Аччыктаан, хаһыҥҥа хаарытан

"Дьулуурдаах кыыс оҕо" аатыртын.

Дьиэ кэргэн олоҕун, тапталын

Эн ситэ билбэккэ хаалбытын,

Аҥардас хаалыы диэн эрэйин

Эдэргэр элбэхтик билбитин.

Эдэркээн Сэбиэт кыыс Ааныска,

Элбэхтик кэлэрэ-барара,

Бөтүҥүн олоҕун сайдыыта

Бэрт үгүс сыратын ылара.

Бар дьонун билигин өйдүүллэр

Түүннэри түбүккэ түһэргин,

Холобур оҥостон кэпсииллэр

Эн күннүүн сырсыбыт сылларгын.

Ол иһин күн бүгүн эн түөскэр

Геройбут Сулуһа кыыстаҕа

Эйиэхэ бар дьонун махтана

Эҕэрдэ бастыҥын эттэҕэ.