Үйэтитэр сөптөөх

      Төрөөбүт үөскээбит таптыыр Аммабытыгар түөрт Социалистическай Үлэ Геройдара олорон ааспыттара. Кинилэр бу бааллар: Лукин Тимофей Спиридонович - сылгыһыт (1949 сыл, бэс ыйын 30 күнэ), Васильева Анна Михайловна, Бөтүҥ нэһилиэгин сельсоветын председателэ (1971 сыл, муус устар 8 күнэ), Яковлев Петр Ионович, республика чемпион ыанньыксыта, "Амма" совхоз Өнньүөстээҕи отделениета (1976 сыл, ахсынньы 23 күнэ) уонна биллиилээх ученай-космофизик Киренскэй Леонид Васильевич.

      Мин бу кылгас ахтыыбын Васильева Анна Михайловнаҕа аныыбын. 1962 сыллаахха "Амма" совхозка кылаабынай зоотехнигынан, директоры солбуйааччынан үлэлиир этим. Ити сыл атырдьах ыйыгар Амма оройуонун делегацията Алексеевскай оройуоҥҥа сыл аҥардаах социалистическай куоталаһыы түмүгүн таһаарса айаҥҥа туруммуппут. Оройуон делегациятын оройуоннааҕы Совет Ситэриилээх комитетын председателэ Ефремов Дмитрий Семенович салайан илдьибитэ. Делегация састаабыгар Васильева Анна Михайловна, Бөтүҥ нэһилиэгин сельсоветын председателэ, Старостина Варвара Ефимовна, оройуон бастыҥ ыанньыксыта Абаҕаттан уонна мин.

      Ол кэмҥэ суол-иис мөлтөх туруктаах этэ. Дьэ, ити кэмтэн ылата Анна Михайловнаны билэр буолбутум. Оччотооҕуга мин эдэр киһи быһыытынан уһуннук үлэлээбит, сааһыра барбыт дьонтон толлорум. Анна Михайловна миигин бу саҕа үлэлээн эрэр киһигин диэбэккэ, эйэ дэмнээхтик тэҥ киһи курдук кэпсэтэр этэ. Ону мин сөбүлээн кинини бу күн сириттэн барыар диэри улаханнык убаастыыр, таптыыр этим. Анна Михайловна 1945-1977 сылларга, барыта 32 сыл устата уларыйбакка төрөөбүт үөскээбит Бөтүҥэр нэһилиэк Советын председателинэн үрдүк таһаарыылаахтык үлэлээбитэ. Ол туоһутунан 1951-1955 с.с. Саха АССР Үрдүкү Советын депутатынан быыбардаммыта, партия Саха Уобаластааҕы комитетын чилиэнинэн аҕыс төгүл талыллыбыта. Саха республикатын норуотун хаһаайыстыбатын үтүөлээх үлэһитин үрдүк аатын ылбыта.

      Анна Михайловна оройуон общественнай-политическай олоҕор активнайдык кыттара. Мин өйдүүрбүнэн партия райкомун оройуоннааҕы комитетын чилиэнинэн, оройуоннааҕы Совет депутатынан элбэхтик быыбардана сылдьыбыта. Партия оройуоннааҕы комитетын пленумнарыгар, партийнай конференцияларыгар, оройуоннааҕы Совет сессияларыгар чаастатык тыл этэрэ уонна баар итэҕэстэри туоратыыга үгүс сүбэни биэрэрэ. Кини наар критиканан үлүһүйбэт этэ.

     Анна Михайловна мин уонна кэргэттэрим иннигэр биир үтүөнү оҥорбутун улаханнык махтанан тураммын умнубаппын. Миигин кыра дьыаланан баайсаннар 1977 сыллаахха ыам ыйыгар партия Уобаластааҕы комитета үлэбиттэн уураппыта уонна от ыйыгар диэри үлэтэ суох сылдьыбытым. Анна Михайловна уонна оччотооҕу ССРС Үрдүкү Советын депутата Трифонова Анна Дмитрьевна миигин үлэтэ да, дьиэтэ да суох сылдьарбын ыйыталаһан бараннар иккиэн Г.И.Чиряевка киирэн туруорсаннар олорор дьиэни, кыра да буоллар үлэни бэрдэрэн тураллар. Кэргэммэр Татьяна Николаевнаҕа тыа хаһаайыстыбатын министерствотыгар үлэ биэрбиттэрэ. Ол ылбыт дьиэбитигэр күн бүгүҥҥэ диэри ньир бааччы олоробут. Анна Михайловнаҕа эмиэ ити дьиэттэн квартира биэрэннэр 15 сыл устата ыаллыы олорбуппут.

     Анна Михайловна кэлин сааһыран да баран, союһунай суолталаах пенсияҕа да олордор төрөөбүт оройуонун кытары сибээһин быспатаҕа. Кини оройуон хаһыатын ылара уонна хаһыакка туох сонун баарын биһиэхэ мэлдьи билиһиннэрэрэ. Түмүкпэр биһиги оройуоммутугар олорон, үлэлээн ааспыт Социалистическай Үлэ Геройдарын үтүө ааттарын Амма сэлиэнньэтин уулуссаларыгар иҥэриэх баара. Үлэ туһа диэн бэйэлэрин олохторун, доруобуйаларын биэрбит чулуу дьоннорбутун үйэтитэр сөптөөх диэммин бэйэм санаабын этэбин.

Захаров Ким Петрович,

 үлэ, тыыл ветерана,

Саха республикатын норуотун

 хаһаайыстыбатын үтүөлээх үлэһитэ