Бу кинигэ биһиги биир дойдулаахпыт, саамай киэн туттар, нэһилиэкпит сирэйэ буолар ытык киһибит – Анна Михайловна Васильева – Сэбиэт Аана туһунан кэпсиир.
Анна Михайловна Васильева – Сэбиэт Аана көстөр дьүһүнүнэн, тутта сылдьарынан, үтүө майгытынан, бэйэтин олоҕунан уонна үлэтинэн дьоҥҥо – сэргэҕэ, ыччакка чаҕылхай холобурбуолар ХХ – с үйэ чулуу киһитэ.Кини 4 эрэ кылаас үөрэхтээх, саха уһулуччу мындыр өйдөөх дьахтара буолан, 32 сыл устата Бөтүҥҥэ олохтоох Сэбиэт бэрэссэдээтэлинэн үрдүк таһаарыылаахтык үлэлээн, Советскай Союзка Сэбиэт бэрэссэдээтэллэриттэн маҥнайгынан уонна соҕотох дьахтар Сэбиэт бэрэссэдээтэлин быһыытынан Социалистическай Үлэ Геройа үрдүк ааты ылбыта.
А.М.Васильева Сэбиэт Аана – коммунист, Аҕа Дойду Улуу сэриитин кыттыылааҕын огдообото, советскай тутуу актыыбынай кыттыылааҕа, 1951 – 1955 сылларга Саха АССР Үрдүкү Сэбиэтин депутата, хас эмэ төгүллээх нэһилиэк Сэбиэтин депутата, 10 төгүл оройуон Сэбиэтин депутата, ССКП Уобаластааҕы комитетын чилиэнэ, Уобаластааҕы партийнай конференция делегата, Саха Республикатын норуотун хаһаайыстыбатын үтүөлээх үлэһитэ, Бөтүҥ нэһилиэгин уонна Амма улууһун Бочуоттаах олохтооҕо, союһунай суолталаах пенсионер.
А.М.Васильева – Сэбиэт Аана 90 сааһын туолар үбүлүөйдээх 2006 сылыгар «Сэбиэт Аана» диэн «Амма чулуу дьоно» сериянан кинигэ тахсыбыта. Сэбиэт Аана аатынан музейга саҥа дьиэ тутуллубута. Улахан республиканскай таһымнаах ыһыах буолбута.
Быйылгы үбүлүөйдээх 2016 сылга А.М.Васильева – Сэбиэт Аана 100 сааһыгар аналлаах Саха Республикатын баһылыга Е.А.Борисов 2015сыл ыам ыйын 29 күнүнээҕи 436 № -дээх дьаьалынан республиканскай хамыыһыйа тэриллэн былааннаах үлэлэр, ону тэҥэ тэрээһиннэр бара тураллар. Хамыыһыйа салайааччытынан Правительство бэрэссэдээтэлин бастакы солбуйааччыта Петр Николаевич Алексеев ананан 2016 сылга А.М.Васильева – Сэбиэт Аанаҕа аналлаах республика салалтата, общественноһа кыттыылаах дьоһун тэрээһиннэр ыытыллыахтара. Ол курдук,республиканскай таһымнаах ыһыах ыытыллыаҕа, Сэбиэт Аана скверэ тутуллуоҕа, ол сквергэ кини бүүһэ туруоҕа, кини аатынан музейга саҥардыы үлэтэ барыаҕа, кини туһунан документальнай киинэ оҥоһуллуоҕа, киэҥ хабааннаах научнай – практическай конференция уонна үөрүүлээх мунньах буолуохтара.
«Сэбиэт Аана» кинигэни кэҥэтэн, «А.М.Васильева – Сэбиэт Аана» диэн ааттаан, «Саха киэн туттар дьоно» сериянан бу кинигэни эһиги дьүүлгүтүгэр таһаарабыт. Кинигэ тахсыытыгар үлэлээбит, кинигэни саҥа матырыйаалларынан кэҥэппит дьоннорбутугар Сэбиэт Аана уолугар Ванифадий Иванович Васильевка, суруйааччы, поэт, журналист Иван Никитич Корякиҥҥа – Уйбаан Бөтүүнүскэйгэ, Сэбиэт Аана музейын салайааччытыгар Ольга Петровна Егороваҕа, Бөтүҥ оскуолатын социальнай педагогар, нэһилиэк общественнай корреспонденыгар Саргылана Ивановна Мартыноваҕа, оскуола библиотекарыгар Василина Васильевна Борисоваҕа, оскуола делопроизводителигэр Любовь Егоровна Мироноваҕа, физика уонна информатика учууталыгар Светлана Андреевна Семеноваҕа, суруйуулары бэрийиигэ, үлэни тэрийиигэ сүрүн күүс – көмө буолбут улуус баһылыгын социальнай боппуруоска солбуйааччытыгар Прасковья Ивановна Емельяноваҕа, үбүлээһиҥҥэ, кинигэ тахсыытыгар күүс – көмө буолбут республикабыт тыатын хаһаайыстыбатын уонна аска – үөлгэ политикатын миниистиригэр Александр Еремеевич Артемьевка, «Амма улууһа» (оройуона) МО дьаһалтатын баһылыгар Николай Архипович Архиповка уонна бары үлэлэспит дьоҥҥо, нэһилиэк дьонун – сэргэтин аатыттан улахан махталбытын биллэрэбит.
Бөтүҥ нэһилиэгин баһылыга
Саргылана Васильевна Борисова
тохсунньу 27 кунэ 2016 с.