Ыкса доҕордуу этибит

     Аҕа дойду улуу сэриитин кэнниттэн 1951 сыллаахха Дьокуускай куоракка маҥнайгы сүһүөх партийнай тэрилтэлэр секретардарын семинардара буолбута. Онно Амма оройуонун Бөтүҥ нэһилиэгин Сэбиэтин ситэриилээх комитетын председателэ Анна Михайловна Васильева баара. Биһиги маҥнайгы көрсүһүүбүт уонна билсиһиибит дьэ ити кэмтэн саҕаламмыта. Анна Михайловна миигиттэн аҕа да буоллар, миигин адьас тэҥнээҕин курдук көрсүбүтэ. Семинарга буолар биэчэрдэргэ куруук бииргэ сылдьарбыт. Кини үлэтин уоппутун кэпсиирэ, сүбэ-ама биэрэрэ.

     Аны 1965 сыллаахха нэһилиэктэр Сэбиэттэрин председателлэрин семинара буолбута. Онно өрдөөҕүттэн билсэр буоламмыт бэркэ табыллан сылдьыбыппыт. Анна Михайловна кыра үөрэхтээх да буоллар билиитэ-көрүүтэ киэҥэ, ханна да сырыттар дьону бэйэтигэр тардар ураты дьоҕурдааҕа, кини олоҕу хайдах баарынан сыаналыыра.

     Анна Михайловна пенсияҕа тахсан баран Дьокуускайга кэлэн олохсуйбута. Мин эмиэ пенсияҕа тахсан бараммын 1984 сыллаахтан Дьокуускай куоракка олохсуйбутум. Ити кэмтэн ылата Социалистическай Үлэ Геройа, норуот хаһаайыстыбатын үтүөлээх үлэһитэ Анна Михайловна Васильева олорор дьиэтэ биһиэхэ иккис дьиэбит курдук этэ. Бары табаарыстыылар түмсэр, кэпсэтэр, бырааһынньыктыыр, үөрэр-көтөр миэстэбитинэн буолбута. Билигин ол күннэри суохтуубут. Сорохторбут хайы-үйэ олохтон туораабыттара. Мин саха чаҕылхай дьахталларыттан биирдэстэрин кытта доҕордоспут үтүө кэмнэрбин, олоҕум умнуллубат кэрэ түгэнинэн сыаналыыбын.

     Анна Михайловна олох биэрбит кэрэ түгэннэрин мүччу туппакка кыраттан үөрэн, дуоһуйан, ытык иэһин сиэрдээхтик толорон, бэйэтин кэмин үрдүк аатын - суолун ылан, чиэстээхтик олорон, элбэҕи оҥорон бу орто туруу дойдуттан барбыта. Мин сылга биирдэ Анна Михайловнаны түүлбэр көрдөхпүнэ дуоһуйабын. Амма улууһун урукку көлүөнэ дьонноро, бэйэлэрин бириэмэлэрин чулуу дьахталларыттан биирдэстэрин Анна Михайловна Васильева аатын үйэтитэргэ күүс-көмө буолуохтара диэн эрэнэбин.

Мария Григорьевна Тарасова, үлэ, тыыл ветерана,

Горнай улууһун Бочуоттаах олохтооҕо