Умнубаппын

     Мин Амма улууһун Бөтүҥ нэһилиэгин Советын председателинэн отуттан тахса сыл үлэлээбит Социалистическай Үлэ Геройун, Норуот хаһаайыстыбатын үтүөлээх үлэһитин Анна Михайловна Васильеваны умнубаппын. Биһиги партия уобаластааҕы комитетын пленумун чилиэннэрэ буоламмыт, хас пленум мунньаҕа буолла да көрсүһэн бииргэ сылдьар этибит. Иккиэн тыа сирин үлэһиттэрэ буоламмыт интэриэспит, кэпсэтэр тиэмэбит биир буолан ордук тапсарбыт. Кэлин иккиэн пенсияҕа тахсаммыт Дьокуускай куоракка таас дьиэ ыламмыт көһөн киирбиппит. Мин Анна Михайловна дьиэтигэр сылдьар буолбутум.

     Советскай былаас кэмигэр Коммунистичскай партия салалтатынан өр кэмҥэ таһаарыылаахтык үлэлээммит, иккиэн Социалистическай Үлэ Геройун үрдүк аатын ылбыппыт биһигини ыкса сибээстээбитэ. Онон үлэттэн дьолломмут дьоллоох дьон этибит.

     Мин билигин сааһыран олороммун урут бииргэ сылдьыбыт сайаҕас майгылаах Анна Михайловнаны чугастык саныыбын уонна умнубаппын. Амма улууһун дьоно-сэргэтэ, чаҕылхай, кэрэ киһилэрин Анна Михайловна Васильеваны аатын үйэтитэр үлэни ыыталларыгар баҕарабын.

Анастасия Семеновна Копырина,

Социалистическай Үлэ Геройа, үлэ, тыыл ветерана,

Уус-Алдан улууһун Бочуоттаах олохтооҕо